Prokuroria Themelore në Prishtinë ia ka kthyer Prokurorisë Speciale rastin e hetimit të aferave të korrupsionit në Postë-Telekomin e Kosovës.

Këtë e ka konfirmuar të mërkurën kryeprokurori i Prokurorisë Themelore në Prishtinë, Imer Beka. Në një deklaratë të shkurtër ai ka thënë se ai rast nuk është për t’u hetuar nga Themelorja, shkruan sot Koha Ditore.

“E kemi kthyer rastin në Prokurorinë Speciale, sepse kemi vlerësuar se ata janë kompetentë për ta hetuar e jo ne”, ka thënë ai.

Beka ka thënë të mos e di nëse Specialja do ta pranojë hetimin e këtij rasti, pas refuzimit që ia kishte bërë një herë dhe transferimit te Themelorja.

Gazeta është informuar se, edhe pse lënda i është kthyer kësaj prokurorie, ende asnjë veprim hetimor nuk është ndërmarrë në këtë rast. Për të marrë qëndrimin zyrtar është kontaktuar ushtruesi i detyrës së kryeprokurorit special, Afrim Shefkiu, por ai nuk u është përgjigjur thirrjeve.